Yeni Azərbaycan Partiyası (YAP) Bərdə rayon təşkilatının IX konfransı keçirilmişdir. Konfrans iştirakçıları əvvəlcə Heydər Əliyev muzeyinin qarşısında ümummilli liderin abidəsi önünə gül dəstələri düzmüş, xatirəsinə ehtiramlarını bildirmişlər.

YAP Bərdə rayon təşkilatının sədr əvəzi İlham Əzimov qurumun fəaliyyəti haqqında hesabat məruzəsi ilə çıxış etmişdir. Bildirmişdir ki, 1992-ci ilin dekabrından fəaliyyət göstərən rayon təşkilatı son illər həm keyfiyyət, həm də kəmiyyət baxımından yenidən qurulmuş, rayonun ictimai-siyasi, mədəni və təsərrüfat həyatında aparıcı qüvvəyə çevrilmişdir.

Rayon təşkilatı ötən konfransdan keçən müddət ərzində daha da təşkilatlanmış, ictimaiyyət arasında kütləviliyi artmışdır. Son iki ildə partiya üzvlərinin sayı 1355 nəfər artaraq 8322-yə çatmışdır. Onlardan 2380-ini gənclər, 2667-sini isə qadınlar təşkil edir.

Konfransda çıxış edən YAP Qadınlar Şurası rayon təşkilatının sədri Xuraman Qurbanova və Bərdə rayon İcra hakimiyyətinin başçısı İlham Ağayev təşkilatın fəaliyyətindən, rayonun ictimai-siyasi həyatındakı rolundan danışmışlar.

Təşkilatın nəzarət-təftiş qrupunun hesabatı dinlənildikdən sonra təşkilati məsələlər müzakirə edilmiş, 55 nəfərdən ibarət rayon şurası və 7 nəfərdən ibarət nəzarət-təftiş qrupu seçilmişdir. Fəqət Şadlinskaya YAP Bərdə rayon təşkilatının sədri seçilmişdir.

YAP icra katibinin müavini, Milli Məclisin deputatı Siyavuş Novruzov və Milli Məclisin deputatı Rauf Əliyev konfransda çıxış edərək Prezident İlham Əliyevin rəhbərliyi ilə əldə olunan uğurlardan, YAP-ın respublikanın həyatında oynadığı roldan danışmışlar.