İyulun 22-də UEFA Avropa Liqasında mübarizə aparan Ağdamın “Qarabağ” klubu ikinci təsnifat mərhələsi çərçivəsində Şimali İrlandiyanın “Portadaun” klubuna qarşı cavab oyununu keçirmişdir.

Səfərdə rəqibini 2:1 hesabı ilə məğlub edən Ağdam təmsilçisi Bakıda keçirilən oyunda 1:1 hesablı heç-heçəyə nail olmuşdur.

Oyunun 70-ci dəqiqəsində Kevin Braniffin vurduğu qolla hesabda geri düşən baş məşqçi Qurban Qurbanovun yetirmələri 83-cü dəqiqədə hesabı bərabərləşdirməyə nail olmuşlar. Bu mövsüm Avropa Liqasında “Qarabağ”ın ən sərrast futbolçusu olan Əfran İsmayılov komandasını məğlubiyyətdən xilas edən qolun müəllifi olmuşdur. Qeyd edək ki, bu, Ə.İsmayılovun cari mövsümdə avrokuboklarda vurduğu 4-cü qoldur.

UEFA Avropa Liqasının üçüncü təsnifat mərhələsində “Qarabağ” klubu “Visla” (Polşa) - “Şaulyay” (Litva) cütünün qalibi ilə qarşılaşacaqdır. “Qarabağ” bu mərhələnin ilk oyununu iyulun 29-da səfərdə, cavab qarşılaşmasını isə avqustun 5-də Bakıda keçirəcəkdir.